የኢምግሬሽን ትርምስ

 

የኢምግሬሽን ትርምስ

የቸርችልን ጎዳና አቀበት በእግርም ሆነ በመኪና እየወጣው ያለ ማንኛውም ተጓዥ ጥቁር አንበሳ ትምህርት ቤት አካባቢ ደርሶ በስተግራው ሲመለከት ሁሌም የማይጠፋ ሰልፍና ግርግር መመልከቱ የተለመደ ነው፡፡

ከተለያዩ የአገሪቱ ክፍሎች መጥተው በአካባቢው ሲንገዋለሉ የሚስተዋሉት ዜጎችም የዚህ ተለምዶአዊ ትዕይንት አንድ አካል ናቸው፡፡ ከቀዬአቸው ቋንቋ ውጪ ሌላ ቋንቋ የማይነገሩት እነኚህ ዜጎች (አብዛኞቹ ሴቶች ናቸው) በአካባቢው ባሉ የመኪና መንገዶች ውስጥ አለአግባብ እየገቡ ሲደናበሩና የትራፊክ ፍሰቱንም ሲያስተጓጉሉ ማየት የብዙዎች ምልከታ ነው፡፡

እንደሚታወቀው ማባሪያ ያልተገኘለት የመካከለኛው ምሥራቅ ጉዞ ለነዚህ ወገኖች እንዲህ በከተማ መንሰራፋት ዋና መንሥኤ መሆኑን ብዙዎች ይረዱታል፡፡ ለአራት ወርና ከዛም በላይ በሆነ ቀጠሮ ፓስፖርት ለማውጣት ወደ አካባቢው የሚጓዙት እነኚህ እህቶች ወይ በቋንቋ ችግር ምክንያት በሚፈጠር አለመግባባት አልያም ለጊዜው የሚሆን እንጀራን በማፈላለግ ሰበብ ካልሆነ በቀር ያን ያህል ረዥም ቀጠሮ ወስዶ በቦታው መገኘት ግራ የሚያጋባ ነው፡፡ ይህ ካልሆነ ግን የአገሪቱ ዜጋ ሁሉ ንቅል ብሎ ወጥቶ በየቀኑ ፓስፖርት እያወጣ ስደቱን ለጉድ አጧጡፎታል ማለት ይቻላል፡፡

በባለጉዳዩም ችግር ሆነ በጉዳይ ፈፃሚው እንከን በአካባቢው ያለው ትዕይንት እንኳን ለዜጋው ለውጭ አገር ሰውም የሚገርም እንደሆነ አስተያየታቸውን ለሪፖርተር የሰጡ እንግዶች ይገልፃሉ፡፡ በእርግጥ የኢምግሬሽንና የዜግነት ጉዳዮች መሥሪያ ቤቶች በየትኛውም አገር ቢሆን ከበድ ያለ ጫና እንደሚኖርባቸው ቢታመንም በኢትዮጵያ ያለው ሁኔታ ግን የየዕለት የትርምስ አውድማ ስለመሆኑ ብዙዎች ይስማሙበታል፡፡ የትርምሱ ዋናው ምንጭ የዜጎች የማይነጥፉ የስደት ጉዞ ነው ቢባል ተቀባይነቱ እንደማያወላዳ ሁሉ ግን የባለሥልጣን መሥሪያ ቤቱም ያልተሳለጠ አሠራር ወይም የአቅም ማነስ ችግር ነው ቢባል የሚያስማማ መሆኑን ተገልጋዮች ይገልፃሉ፡፡

ኤፍሬም አየለ በዲቪ ሎተሪ አማካይነት ወደ ባሕር ማዶ ሊጓዝ የተወሰኑ ቀናት ቀርተውታል፡፡ ከኤምባሲው በተገለፀለት የጉዞ መሥፈርት ምክንያት ፓስፖርት ለማውጣት ነው በኢምግሬሽንና ዜግነት ጉዳይ ባለሥልጣን የተገኘው፤ እንደ ኤፍሬም አስተያየት የባለሥልጣኑ ያልተቀናጀና ያልተቀላጠፈ አሠራር ሁሉንም ባለጉዳይ በአንድ በር፣ በአንድ መስኮትና በአንድ መንገድ ለማስተናገድ ተገዷል፡፡ የኢምግሬሽን ባለሥልጣን በመንግሥት በተሰጠው ሥልጣን መሠረት ፓስፖርት መስጠት ብቻ ሣይሆን ዜጎች ከአገር መውጣትና መግባት ጋር የተያያዙ በርካታ ጉዳዮችንም ይከታተላል፣ ያፀድቃል፣ ይመልሳል፡፡ ታዲያ የዚህ ሁሉ ጉዳይ መስተናገጃ መንገድ አንድ መሆኑ ለብዙዎች እንቆቅልሽ እንደሆነ ይታመናል፡፡ ባለሥልጣኑ ከተለያዩ የመንግሥትና የግል መሥሪያ ቤቶችና ተቋማት በትብብር የተፋጠነ የፓስፖርት ዕደላ እንዲኖር ያላሰለሰ ድጋፍ ማበርከቱ የሚያስመሰግነው ሆኖ ሳለ “የለም በዚህ ጊዜ ብቻ ካልሆነ ደህና ሰንብቱልኝ” ብሎ ማመናጨቅና በተፈቀደው ጊዜ ውስጥም ጉዳዩን ተከታትሎ ተፈፃሚነት እንዲኖረው አለማስቻል ብዙዎችን ሲያበሳጭ የሚገኝ ጉዳይ ነው፡፡ አቶ ዳንኤል ለይኩን (ስማቸው ተቀይሯል) በመሥሪያ ቤታቸው በኩል በተገኘ የሥራ ጉዞ ወደ ውጭ አገር ለመጓዝ ፓስፖርትና የተለያዩ መሥፈርቶችን ማሟላት ይጠበቅባቸው ነበር፡፡ በድጋፍ ደብዳቤ ምክንያት ለአንድ ሳምንት ቀጠሮ ወስደውና በቀጠሮው ቀን ፓስፖርቱን ስለማግኘታቸው ተማምነው ቀናቸውን ቆጥረው ሲጨርሱ በፈገግታ ወደተቀበላቸው ግለሰብ ብቅ ይላሉ፡፡ ያልጠበቁት ነገር እንደተፈጠረ ማመን ተስኗቸዋል፡፡ ለጉዞው ሁለት ቀናት ሲቀራቸው በፓስፖርቱ ቅጽ ላይ በተፈጠረ የሙሌት ስህተት ምክንያት ለሌላ አንድ ሳምንት እንዲቀጠሩ ግድ ሆኗል፡፡ ለተፈጠረው ስህተት ሙሉ ኃላፊነቱን ለባለሥልጣኑ ሠራተኞች እንደተዉ የሚናገሩት አቶ ዳንኤል የጉዳዩን አስቸኳይነት ተገንዝበው የተፈጠረውን ስህተት በአስቸኳይ ማረም ሲገባ “የሌላ ሰው ጊዜ አትግደል!” በሚል አግባብ የጎደለው ምላሽ መሰናበታቸውን በምሬት ይገልፃሉ፡፡ እንደ አቶ ዳንኤል ሁሉ በርካታ የውጭ አገር ተጓዦች መስተካከል በሚችል ጥቃቅን ችግር ምክንያት ከጉዞአቸው እንደሚስተጓጎሉም በቦታው ሪፖርተር ያነጋገራቸው ግለሰቦች በአስተያየታቸው ገልፀዋል፡፡

“የባለሥልጣኑ ዋናው ችግር በአንድ ሰው ትከሻ ላይ የተጫነውን ከፍተኛ ጫና ያለበትን የኢትዮጵያውያንን ጉዳይ ለሌሎች አለማከፋፈልና የባለጉዳዩን ዓይነትም እንደየጉዳዩ አይቶ በተለያየ መንገድ ማስተናገድ አለመቻል ነው፤” የሚለው ወጣት ዝናው ደረጀ የባለሥልጣኑ አንዳንድ ሠራተኞች ሥነ ምግባርም ሌላው የችግሩ አካል መሆኑን ያሰምርበታል፡፡ በተለይ በቢሮዎች ደጃፍ ላይ ቆመው ስም የሚጠሩና ባለጉዳዮችን የሚያስገቡ ሠራተኞች ከሥራው ጫና ይሁን ወይም ከሌላ ነገር በመነጨ ባለጉዳዮችን ሲያመነጫጭቁና ሥነ ምግባርን ባልተላበሰ መልኩ ለሰው ችግር መፍትሔ ለመስጠት ሲሞክሩ ማየት የዕለት ተዕለት ውሏቸው እንደሆነ ብዙዎች ይስማሙበታል፡፡

ሌላው ችግር በሚጠፉ ቅጾች (ፋይሎች) ዙሪያ ያለው ነው፡፡ ወይዘሪት ቤተልሔም እንግዳው (ስሟ ተቀይሯል) ፓስፖርቷ ላይ በተፈጠረ የስም ስህተት ምክንያት ለሚመለከተው ክፍል አቤት ማለቷንና ከብዙ ውጣ ውረድ በኋላ ምላሽ እንዳገኘች ተስፋ በማድረግ ስትጠባበቅ ፋይሏ መጥፋቱን መስማቷ እንዳበሳጫት ትናገራለች፡፡ “እዚህ ቤት ከአንዴም ሁለት ጊዜ መጥቻለሁ፣ሁለቱንም ጊዜ ግን በከፍተኛ ችግር ውስጥ ነው ያለፍኩት፡፡ አንዳንዶቹ ሠራተኞች ባለጉዳይን የማጉላላትና የማበሳጨት ባሕሪን ሳያውቁት እንደተላበሱት ይሰማኛል፤” ስትል ነበር አስተያየቷን ለሪፖርተር የገለፀችው፡፡

ከፍተኛ የሥራ ጫና እንዳለባቸውና የማይነጥፈው የባለጉዳይ ክትትልም ከአቅም በላይ ወደሚሆንበት ደረጃ የደረሰባቸው የሚመስሉት ሠራተኞች ድምፃቸውን ለሪፖርተር በቀጥታ ባይሰጡም በተዘዋዋሪ መንገድ አስተያየታቸውን ገልፀዋል፡፡ እንደ ሠራተኞቹ አመለካከት ከሆነ በባለሥልጣን መሥሪያ ቤቱ የሚታየው ግርግርና የሥራ ጫና አንድም ከተገልጋዩ ባለጉዳይ ከፍተኛና የማይቀንስ ቁጥር የሚመነጭ ሲሆን፣ ሁለተኛ ደግሞ በሚጠቀሙባቸው የኤሌክትሮኒክ መሳሪያዎች የአቅም ማነስና የቴክኒክ ችግር እንደሆነ ጠቁመዋል፡፡ ያለውን ችግር ከግምት ውስጥ በማስገባት ተገልጋዩ ኅብረተሰብ በትዕግስትና በርጋታ ቢጠባበቅ የተፋጠነና ሰላማዊ አገልግሎት መስጠት እንደሚቻልም ይገልፃሉ፡፡

ቀን በቀን የማይቋረጥ ሰልፉና የአገልግሎት ጥያቄ በሚበዛበት በእንዲህ ዓይነቱ መሥሪያ ቤት መንግሥት ተከታታይነት ያለው ትኩረትና ክትትል በማድረግ የዜጎቹን ጉዳይ በሚፈለገው ጊዜና ቦታ እንዲፈፀም ጥረት ማድረግ እንዳለበትና ለአገልግሎት ሰጪዎችም አስፈላጊውን ድጋፍ ማድረግ እንደሚገባው የሚናገሩት ተገልጋዮች “ጊዜ ያለአግባብ እየጠፋ ነው!… የሕዝብ እንግልትም እየባሰ ነው! ጊዜና ጉልበት ለልማት ይውል ዘንድ እንተባበር!!” የሚል መልዕክታቸውን ለሚመለከተው አካል ያሰማሉ፡፡

Ethiopian Reporter

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: